Ang sabi ng matriarka ng mga Xenaki kay Armand, “Ayus-ayusin mo ang disposisyon mo sa mga babae. Kapag ikaw ay nakahanap ng katapat, luluha ka ng asin! At ’wag kang tatakbo sa akin para humingi ng tulong.”
Lihim na sinisibangutan na lang niya ito. Hindi siya haliparot, okay? Mahal niya lang masyado ang pagiging sundalo. Pinaghirapan niya ang puwesto niya sa Scout Rangers, ipagpapalit ba niya iyon para lang sa isang babae?
Subalit tama yata ang mommy niya. Dahil noong makilala niya si Jade Jardin, naiisip niyang gawin ang isa sa dalawang bagay na talaga namang ikadudurog ng puso niya—iyong magbitiw sa tungkulin bilang sundalo, o ang dalaga ang isuko para hindi ito kailanman madamay sa masalimuot na mundo ng isang unipormadong tulad niya….
Comments